طوفان وطايف بالبشر
أصل الحياة طوفة
ما نفعنا يوم العمى
ولا حتى كام شوفة
صوت المنادي ينادي
من أسبانيا للكوفة
يا طالبين الأمان
هذا الأمان خوفة
من العدم والألم
والعمر دا بروفة
يا طالبين الحقيقة
المعنى دا كعبتي
كل الحشود جايين
زحامين فجاج سكتي
ولا حد جايلي أنا
جايين عشان رحمتي
كل الحشود رايحين
وكأنهم ناسيين
الجسم طايف
والقلب مش شايف
عارفين ومش عارفين
مكنوش في يوم قاصدين
وأنا الوحيد الغني
وهما هنا مساكين
جايين عشان جنتي
وأنا جنتي هما
يعيشوا بني أدمين
يبقى الجميع أمة
والأرض هادية ظريفة
ولا فيها يوم غمة
يا زحام الحشد بادي
كما كل عام عادي
الزحمة عزوة وهيبة
ولا الزحام خيبة
ولا الجميع ضايعين
يا رافعين الايادي هناك
يا سادة يا باكين
الحب هو السبيل
لو كنتو يوم عارفين
سايق عليكو السفر
والطاعة والساعة
سايق عليكو السحر
دي الجنة منباعة
لتكونوا صدق وعدل
في دنيا خداعة
و تكونوا طيبة بشر
ببراءة ووداعة
فتعيشوا بني ادمين
وتموتوا بني ادمين
