صورة من فيلم Seven pounds
بنيتك كعبة في قلبي
مليتي الكعبة بالأصنام
ووليت قبلتك حبي
قتلتي القلب ف الإحرام
وخدتي القلب وسافرتي
وسبتي الشك والأوهام
ورغم ضياعي من بعدك
ورغم الحيرة والآلام
لازالت بشوفك الجنة
وعمري ما هوصفك بكلام
وقلتي البعد بينسي وبيقسي
وقلت بأني هبقى تمام
طلعت بتوه كل يوم أكتر
كأني غريب في بحر زحام
ألوم وجعي؟! ألوم حبك؟!
مانيش عارف مين اللي يلام
خلقتك في الخيال سموات
وكنت في غاية الإحكام
لمحت ضباب وجيت أفهم
لاقتني يأست م الإبهام
وغاب عني الأمل تاني
وودعني كأنه ما كان
أتاري الفرح كان كذبة
ونكتة سخيفة للأحزان
عاندت الدنيا في حبك
عاندت البعد والحرمان
أتاري الحب كان كارثة
وحكم نهائي بالأعدام
بشك بنفسي في نفسي
وأكذب وحيي والإلهام
كتير كدبوا كتير هانوا
وفضلوا يكملوا الأحلام
لكن حظك وقع فيا
فوقعت كل حاجة أوام
لا عارف أعود كما الأول
ولا لاقي لنفسي زمام
وعمر العيب ما كان منك
دا عيب الدنيا والأيام
دا عيب الحزن في قلبي
حصان جامح ملهوش لجام
دا عيب العشق لو يصفى
وتيجي تعكره الصدفة
فيطلع صدقه أي كلام
يموت طبعا على الواقع
يعيش جدا بدون مانع
ولكن بس في الأفلام
ليست هناك تعليقات:
إرسال تعليق