الأسم إنسان التعب
أبن السبب من غير سبب
العمر وقت وله زمن
له وقت بردو في دهر الصخب
الحالة ميت بس عايش
علشان يموت يمكن يعيش
ياللعجب
عنوانه حتة ملهاش مكان
حتة هناك بتاريخ زمان
قاعدة بتصرخ بالغضب
المهنة عاطل بالعمل
أو ربما عامل بمهنة العطل
كل العمل أصلا هطل
ومفيش أمل رغم العمل
و كفاية يا عم الملل
هذي الحياة أصلا خلل
و ديانته شاكك في الشك نفسه
و الشك شاكك في عقله بردو
و عقله أبره تشك قلبه
وقلبه جنبه وهو واقف
و خوفه خايف من خوفه هو
و هو عارف وعايشه جوه
رقم بطاقته مبيحفظوش
أصل رقمه ما أختروش
أعتبره واحد.. أعتبره صفر
ما لانهاية.. كل الحكاية
مكنتش أصلا باختياره
البداية والنهاية
والرواية خارج قراره
بياناته أصلا ملهمش قيمة
فأديها بالجزمة القديمة
وهي هيا عيشة تجيب ورا
فأكيد بطاقته مزورة
ليست هناك تعليقات:
إرسال تعليق