كان حر عايش بين عبيد
بأسه مكنش شديد..
يأسه مكنش جديد
كان قلبه جامد
لكن مكنش حديد
كان ضحكه عالي
لكن مكنش سعيد
كان عمره ينقص كل يوم
فالموت يزيد
من طلته الزحمة تبلع دوشته
فيعود بنفسه لجوا نفسه وحيد
يبقاله ايه بعد اللي صار؟؟
يبقاله ايه؟؟
غير انتحار..
غير انتصار حالة انهيار
غير ضل باهت بقعة غامقة على الجدار
وعلى الجدار مقبلش أنه يكون مجاز لصورة
محبوسة في إطار
مقبلش بالبراوز
مقبلش أنه يصير في يوم حبة أزاز
متبعترين حوالين مجاز
"حالة انهيار"
براوز حزين
دابت دوبارته م الانتظار
والانتظار حالة ابتزاز..
العمر صعب الاجتياز
والموت انجاز إن جاز
والواحد مهما إن عاز
تمشي حياته على مزاجها
بهدؤها كدا بإزعاجها
يخسرها في يوم لو فاز
الصبح نشاز لكن ينعاز
والحزن انحاز لليل الغاز
العتمة توسع واحدة واحدة
تحضن الليل اللي ساكنك
تحتوي الضلمة اللي فيك
يا هل ترى كل شيء بتحن له
هيحن ليك
ولا الوجع كدا بيفاديك
يا ليل طويل ملوش أخر
القلب زاهد ولا صابر؟؟
الكون دا ساحر ولا ساخر
ولا انا مبقتش قادر؟؟
أنا غاوي ليل
ولا الليالي بتغوي روحي؟؟
ولا الليالي دي كاس نبيت
نشوة جروحي؟؟
ليست هناك تعليقات:
إرسال تعليق